الجمعة، 27 ديسمبر 2013

25 - عن العمر الضايع في الانتظار


هناك أعوام تمر فى حياتك دون أن يحدث فيها شىء سوى أن تمر. ليس هذا أمر طبيعيا، لكنه معتاد. باب الخروج - عز الدين شكري

أعتقد ان دي السنين اللي بتمر واحنا مستنين حاجة تحصل .. الحاجة او الحاجات اللي بنقضى عمرنا كله منتظرينها واللي ممكن ما تحصلش ابدا

مش عارفه ازاي بعض الناس بيقدروا يتأقلموا مع أقدارهم اللى غير ما اتمنوا وبيعيشوا ويستمتعوا بحياتهم وكأن اللى حلموا بيه قبل كده ماكنش ليه وجود ... بحسدهم بصراحة

انا عن نفسي ما بقدرش أتأقلم ابدا بفضل استني ومش بعرف ابطل تفكير ومش بعرف أرضى فعلا 

مش فاهمه منطق ان الخير هو اللى بيحصل لينا حتى لو احنا مش عايزينه طيب ازاى واحنا مش مرتاحين فيه 

وان اللى بنحلم بيه يبقى شر طالما اتمنع عننا طيب ليه بتفضل أرواحنا متعلقة بيه ونفضل مستنين انه يحصل ؟

بقالي 20 سنة مستنيه حاجات تحصل ايون والله من اول ما بدأت تقريبا افكر فى المستقبل يعنى ومن انا عندي 10 سنين 

مافيش منها حاجة حصلت

كنت متخيلة ان لما اوصل سن ال30 هكون حققت كل أحلامي اكتشفت مع مرور السنين ان دايما الحاجات اللى مش عايزاها تحصل هى بس اللى بتتحول لواقع والحاجات اللى طول الوقت بهرب منها ما اقدرتش اتخلص منها وكأنها قدر 

كتير قوي 20 سنة لما فجأة اكتشتف انهم عدوا فعلا
حسيت قد ايه العمر والدنيا مالهمش اى امان وان فعلا كلها ايام وبتنقضي ومع ذلك 
عارفه اني مش هقدر اعمل حاجة غير انى استنى حتى لو مبقاش فى امل ان اى حاجة من اللى انا بتمناها تحصل ... عارفه انى عمري ما هقدر أوصل للراحة بالتعود والتأقلم على مستجدات حياتي اللي عمري ما استنيتها



الاثنين، 25 نوفمبر 2013

24

رواية قواعد العشق الأربعون وبعدها رواية ساق البامبو
اعتقد أنهما كافيان لعودتي للقراءة بنهم من جديد
أشعر انى بحاجة للمزيد من تلك القراءات 
التى تبث في الروح حياة و تحرك ساكنا بداخلنا  
فثمة تغير لا يمكن أن نقدم عليه دون علامات متراكمة
بعض الكتب نقطة نور تضئ لنا ظلمة أرواحنا
لذا اعتقد اني بحاجة ملحة للقراءة اكثر من الكتابة هذه الأيام
في انتظار مقترحاتكم :)